མཁན་ཆེན་པདྨ་ཤེས་རབ་རིན་པོ་ཆེ་ནི་སྤྱི་ལོ་ ༡༩༣༦ ལོར་བོད་ཁམས་སྡེ་དགེ་འཇོ་མདའི་གྲོང་ཚོ་རི་ཕུ་རུ་འཁྲུངས། དགུང་ལོ་བརྒྱད་ལ་ཕྱུགས་རྫི་མཛད་བཞིན་ཨ་ཁུ་བླ་མ་ཆོས་བཟང་ལས་ཡི་གེ་ཀློག་འབྲི་སྦྱངས། དགུང་ལོ་བཅུ་བཞི་ལ་ལྷ་སར་ཕེབས་ཏེ་བོད་བརྒྱུད་ནང་བསྟན་གྱི་ཆོས་ལུགས་ཀུན་གྱི་མཁས་པ་མང་པོ་ལས་སློབ་གཉེར་མཛད།
སྤྱི་ལོ་ ༡༩༥༣ ལོར་ཞེ་ཆེན་ཀོང་སྤྲུལ་རིན་པོ་ཆེས་དགེ་ཚུལ་གྱི་སྡོམ་པ་གནང་། སྤྱི་ལོ་ ༡༩༥༩ ལོར་རྒྱ་གར་དུ་བྲོས། སྐྱབས་རྗེ་དིལ་མགོ་མཁྱེན་བརྩེ་རིན་པོ་ཆེ་དང་མཇལ་ཏེ་གསང་བ་སྙིང་པོའི་རྩ་རྒྱུད་དང་ཀློང་ཆེན་པའི་མན་ངག་མཛོད། རིན་ཆེན་གཏེར་མཛོད་སོགས་མདོ་སྔགས་ཀྱི་ཆོས་མང་པོ་གསན། སྐྱབས་རྗེ་བདུད་འཇོམས་རིན་པོ་ཆེ་དང་པད་ནོར་རིན་པོ་ཆེ། སྟག་ལུང་རྩེ་སྤྲུལ་རིན་པོ་ཆེ་སོགས་ལས་ཀྱང་ཆོས་མང་པོ་གསན།
སྤྱི་ལོ་ ༡༩༦༨ ལོར་སྐྱབས་རྗེ་པད་ནོར་རིན་པོ་ཆེས་མཁན་ཆེན་པདྨ་ཤེས་རབ་རྣམ་གྲོལ་གླིང་དགོན་པར་ཆོས་འཆད་ཕྱིར་གདན་འདྲེན་ཞུས། སྤྱི་ལོ་ ༡༩༧༨ ལོར་སྔ་འགྱུར་རྙིང་མའི་བཤད་གྲྭ་བཙུགས་པ་ནས་བཟུང་ད་བར་ཁོང་གིས་ཐུགས་རྗེ་ཆེན་པོས་སློབ་མ་རྣམས་ལ་ཆོས་འཆད་མཛད་ཅིང་བཤད་གྲྭའི་འགན་ཁུར་མཛད། སྡེ་སྣོད་གསུམ་ལ་མཁས་པ་མཆོག་ཏུ་གྱུར་ཞིང་མདོ་སྔགས་དང་སྒྲ་སྙན་ངག་སོགས་འཆད་པ་མ་ཟད་གུ་རུ་པདྨ་འབྱུང་གནས་ཀྱི་རྣམ་ཐར་སོགས་བརྩམས་ཆོས་མང་པོ་མཛད།