དྲན་བཞིན་ཡོད།

དྲན་བཞིན་ཡོད།

བླ་མ།

གཏན་བདེ་ལམ་མཆོག་སྟོན་མཁན་བླ་མ་ཡིས། །

རྒྱུད་ལུང་མན་ངག་གནང་བ་དྲན་བཞིན་ཡོད། །

གནས་སྐབས་མི་རྟག་གཡོ་བས་སྒྲིབ་ན་ཡང་། །

ནམ་ཞིག་སྒྲིབ་མེད་འོད་གསལ་ཀློང་དུ་མཇལ། །

ཕ་མ།

ཚེ་ལུས་སྲོག་གསུམ་སྦྱིན་མཁན་ཕ་མ་ཡིས། །

དཀའ་ཚེགས་རྒྱུ་གསུམ་གནང་བ་དྲན་བཞིན་ཡོད། །

གནས་སྐབས་འདུས་མཐའ་བྲལ་བའི་ཆོས་ཅན་འདི། །

ཟད་ནས་ཟག་མེད་དབྱིངས་སུ་སླར་ཡང་འཕྲད། །

སློབ་མ།

སྐྱབས་སེམས་དད་གསུམ་འཇོག་པའི་སློབ་ཚོགས་ཀྱིས། །

འདི་ཕྱིའི་རེ་ལྟོས་བྱེད་པ་དྲན་བཞིན་ཡོད། །

གནས་སྐབས་རང་རང་ཕྱོགས་སུ་གྱེས་ན་ཡང་། །

གཏན་བདེའི་ཁང་བཟང་ཞིག་ཏུ་སླར་ཡང་འཛོམ། །

བུ་ཕྲུག

སྐྱིད་སྡུག་རེ་གསུམ་བཅང་བའི་གཅེས་ཕྲུག་གིས། །

དགའ་སྐྱོའི་རྣམ་འགྱུར་མང་བ་དྲན་བཞིན་ཡོད། །

གནས་སྐབས་ཡུལ་ཕྱོགས་གང་དུ་འགྲོ་དགོས་ཀྱང་། །

བྱམས་བརྩེའི་མཁའ་སྤྲིན་ཀློང་དུ་ཡང་ཡང་མཇལ། །

ཞེས་ཝི་ཏི་ནམ་གྱི་རྒྱལ་ས་ཧོ་ཆི་མེན་དུ། རྒྱལ་ཁམས་པ་གསང་སྔགས་བསྟན་འཛིན་ནས། 01/01/2020

མུ་མཐུད་ཀློག