དགའ་སྐྱོ་གཉིས་འཛོམ་གྱི་གླུ་ཐོལ་བྱུང་སྒྱུ་མའི་ངལ་སྟེགས་ཞེས་བྱ་བ།

དགའ་སྐྱོ་གཉིས་འཛོམ་གྱི་གླུ་ཐོལ་བྱུང་སྒྱུ་མའི་ངལ་སྟེགས་ཞེས་བྱ་བ།

དྲིན་ཅན་བླ་མའི་ཞབས་ལ་གསོལ་བ་འདེབས། །

དེ་རིང་སྙན་པའི་གླུ་ཞིག་ལེན་པར་འདོད། །

བྱིན་རླབས་ན་བུན་ལ་ངེ་ལིང་ངེ་འཁྲིགས། །

དངོས་གྲུབ་ཆར་ཆུ་ཟིལ་མ་ཟིམ་ཞིག་འབབ། །

བདག་དང་ཆོས་མཐུན་སྐལ་མཉམ་གྲོགས་རྣམས་ཀྱིས། །

དགའ་སྐྱོ་གཉིས་འཛོམ་གླུ་འདི་ཐེངས་གཅིག་གསོན། །

མཚན་ལྡན་བླ་མ་མཇལ་བས་དགའ་ནས་ཡོད། །

དོན་ལྡན་ཞབས་ཏོག་མ་ནུས་སྐྱོ་ནས་ཡོད། །

ཕ་མས་ཆོས་ལ་བཏང་བས་དགའ་ནས་ཡོད། །

ཕ་མར་དྲིན་ལན་མ་བསབས་སྐྱོ་ནས་ཡོད། །

དལ་བའི་ལུས་རྟེན་ཐོབ་པས་དགའ་ནས་ཡོད། །

ཆོས་ལ་བརྩོན་འགྲུས་མ་ནུས་སྐྱོ་ནས་ཡོད། །

རྟག་འཛིན་བློ་སྣ་ཟློག་པས་དགའ་ནས་ཡོད། །

ཉམས་ལེན་ཕྱི་བཤོལ་ཤོར་བས་སྐྱོ་ནས་ཡོད། །

འཁོར་བ་ཞེན་པ་ཆོད་པས་དགའ་ནས་ཡོད། །

ཐར་བ་ད་དུང་མ་འགྲུབ་སྐྱོ་ནས་ཡོད། །

ལས་འབྲས་བསླུ་མེད་གོ་བས་དགའ་ནས་ཡོད། །

བླང་དོར་བློ་གྲོས་མ་རྫོགས་སྐྱོ་ནས་ཡོད། །

བདེ་ཆེན་དམ་ཆོས་མཇལ་བས་དགའ་ནས་ཡོད། །

བདེ་དགའ་རྒྱ་མཚོ་མ་ཐོབ་སྐྱོ་ནས་ཡོད། །

སྐྱབས་འགྲོའི་ཡོན་ཏན་དྲན་བཞིན་དགའ་ནས་ཡོད། །

བློ་གཏད་ལིང་བསྐྱུར་མ་ནུས་སྐྱོ་ནས་ཡོད། །

སེམས་བསྐྱེད་རིན་ཆེན་མཇལ་བས་དགའ་ནས་ཡོད། །

གཞན་ཕན་མཐའ་རུ་མ་ཕྱིན་སྐྱོ་ནས་ཡོད། །

བསྐྱེད་རྫོགས་ཟབ་མོ་ཐོབ་པས་དགའ་ནས་ཡོད། །

མཆོག་ཐུན་དངོས་གྲུབ་མ་རྫོགས་སྐྱོ་ནས་ཡོད། །

ཆོས་ཀུན་སྟོང་ཉིད་གོ་བས་དགའ་ནས་ཡོད། །

སྒྱུ་མའི་ལྟད་མོ་མ་རྫོགས་སྐྱོ་ནས་ཡོད། །

རྫོགས་ཆེན་གདམས་ངག་ཐོབ་པས་དགའ་ནས་ཡོད། །

ཉམས་ལེན་གཤོག་རྩལ་མ་རྒྱས་སྐྱོ་ནས་ཡོད། །

འགྲོ་དོན་གྲངས་མེད་མཐའ་རུ་མ་ཕྱིན་པར། །

བསྟན་པའི་རྒྱལ་མཚན་ཕྱོགས་བཅུར་འཛུག་ནུས་ཤོག །

ཅེས་དགའ་སྐྱོ་གཉིས་འཛོམ་གྱི་གླུ་ཐོལ་བྱུང་སྒྱུ་མའི་ངལ་སྟེགས་ཞེས་བྱ་བ་འདི་ནི། སྔགས་པ་རྡོ་རྗེ་འཛིན་པ་གསང་སྔགས་བསྟན་འཛིན་ནས་བལ་ཡུལ་འཕགས་པའི་ཡུལ་མཆོད་རྟེན་བྱ་རུང་ཁ་ཤོར་གྱི་ཉེ་འགྲམ་རང་གནས་བསམ་གཏན་གྲུབ་པའི་ལྡིང་ཁང་དུ། ཐུན་ལ་གཞོལ་བའི་བར་གསེང་ཞིག་ཏུ་འཇམ་ཆར་དལ་གྱིས་འབབ་པའི་སྐབས་སུ་བཀྲ་ཤིས་རྟགས་བརྒྱད་ཀྱི་གྲངས་ལྡན་གླུ་དབྱངས་འདི་བླངས་པས་ཕན་བདེའི་ཆར་རྒྱུན་རྒྱུན་ཆད་མེད་པར་གྱུར་ཅིག།

རབ་བྱུང་བཅུ་བདུན་པའི་ལྕགས་བྱི་ལོ་བོད་ཟླ་གསུམ་པའི་ཚེས་བཅུ་གཅིག་ཉིན་ཤར་མར་ཡིག་ཐོག་ཏུ་བྲིས་པ་དགེའོ། ། 03/05/2020

མུ་མཐུད་ཀློག